هل الربيع ... للشاعر أحمد الغرباوي

 

(( هل الربيع ))

هل الربيع وبان

واخضرت الأغصان

هل بجماله وابتسم

وزهزه الكون عطر وجمال ألوان

صحصح الزهر من نومه

وقالي اصحى وفوق يا نعسان

تعالى نسمع أحلى نغم

البلبل النشوان

تعالى نقول للحب نعم

وننسى قسوة الحرمان

ننسى ليالي العدم

وافتح للهوا الأحضان

ده الربيع هل وجانا

واحلوت الألوان

يلا نفرح سوا

ونسمع الألحان

سهرانة نجوم السما

ومعانا القمر سهران

يحلى السهر فى المسا

والكون بالربيع فرحان

يرقص يغني الطير متهني

والزهر على الأغصان

يغني لحن الهوى

ويسامر البستان

صاحية العصافير تزقزق

ويّا الفجر بدري في أمان

تصبح على الشمس وهية بتشقشق

على الكون تصبح ويعزفلها الكروان

يغنوا لحن الأمل

انتهى وقت الكسل

حي على العمل والربيع عنوان

وداع يا برد وداع يا ألم

خلاص آن الآوان

وانتهى الملل

هل الربيع وابتسم

والجمال فى الدنيا إترسم

صورة جميلة حلوة

بدون ريشة أو قلم

يا دي الجمال والهنا

يارب يارحمن يا خالق الأكوان

هل الربيع وابتسم

واخضرت الأغصان

أحمد الغرباوي