رمضان الخير
.....
رمضان بالخير هل و هالل
وياه البركة ف كل مكان
السما أنوار و النور عامل
ف قلوبنا عمار جنة رضوان
و الزينة شوارع و حواري
و قطايف دايما تحلالي
و كنافة من النوع الغالي
نتلموا عليها بطول رمضان
رمضان بالخير هل و هالل
وياه البركة في كل مكان
من اول يوم نبدأ تراويح
نتجهز و نجهز حالنا
و نقضي بقيت الليل تواشيح
و سحور و حكاوي مع عيالنا
و الفجر يجينا يدق الباب
ع الجامع نجري خوات و صحاب
و تمللي بناخد بالأسباب
أرواحنا تحس سلام و أمان
رمضان بالخير هل و هالل
وياه البركة ف كل مكان
الصبح نسمي و نتوكل
علي رب كريم لجل الأرزاق
و صيامنا لا يمكن يتأجل
دي ساعاته مكارم للأخلاق
و نعود من بعد شقا لبيتنا
الله علي قعدة لمتنا
نستني المدفع و بإيدنا
بنغزي القلب بنور قرآن
رمضان بالخير هل و هالل
وياه البركة ف كل مكان
و ف اخر عشره نروح عاكفين
ف المسجد ويا ركوع و سجود
نستني القدر بكل يقين
ندعي و نتمني من المعبود
و الست تقوم ف البيت تجديد
و عمايل كعك عشان العيد
و الكل بيحضن لبس جديد
و صلاة العيد فرحتها جنان
رمضان بالخير هل و هالل
وياه البركة ف كل مكان
محمد ابو العبادى
ليست هناك تعليقات:
إرسال تعليق