عن الآه سألونى
(مقالة ايقاعية باللغة المحكية)
بقلم..مرقص إقلاديوس
......
تفتكروا كل اللى بيقول الآه بيقولها;
ويحق ليه يقولها من قلبه.
أصل الآه أسبابها كتيرة.
فيه اللى بيقولها بيشتكي من حبه.
و فيه اللى بيقولها بيشتكي من غلبه.
و فيه اللى بيقولها بيشتكي من زمانه.
و فيه اللى بيقولها بيشتكي من مكانه.
و تصدقوا...
عمر ما حد بيقولها و يشتكي من نفسه.
اللى بيقولها و بيشتكي من حبه أمره عجيب جدا.
أصل أكيد فيه غلط يا إما فيه يا في حبيبه يا في حبه.
مش عارف ده الواحد يقولله ايه.
أحسن حل يقعد يقول آه جنبه.
و فيه اللى بيقولها بيشتكي من غلبه.
و مين عارف الناس اللي مغلبينه و لا الدنيا اللي مغلباه.
و لا برضو هوا اللي مغلب نفسه.
و فيه اللى بيشتكى من زمانه مع إن زمنه هوا زمن غيره.
و فيه اللى سعدا و ناجحين
غيرش بس هوا اللي مش لاقي سبب يشتكي منه.
أصل الزمن تغييره صعب
و الأسهل الواحد يغير نفسه.
اما بقا اللى بيشتكى من مكانه فدي امرها سهل.
يا يغير مكانه
يا إما كدة كدة المكان هيرحله هوا شخصيا.
بعد شوية وقت من نفسه.
هأقولك سر يا صاحبى..
اللى ما بيغيرش نفسه بمعونة ربه.
عشان يجارى الزمان و المكان و الناس و الحياة.
أكيد هتغيره الحياة
و يا خوفى الحياة تخليله الآه آهات.
اديني قلتها مباشرة واضحة صريحة.
عشان كل واحد يلحق يراجع نفسه.
ملاح بحور الحكمة ..مرقص إقلاديوس
ليست هناك تعليقات:
إرسال تعليق