احلم وعيش ... للشاعر أحمد الغرباوي

 

((احلم وعيش))

احلم وعيش..

غير حلمك مافيش
يرسي بيك على الشطآن
دنيا رخيصة ماتساويش
ولا حتى لحظة أمان

احلم وعيش أحلامك
لون بالحياة أيامك
وازرعها حب وحنان

زي نفسك حب الغير
واتفائل وافعل خير
أكيد تكون كسبان

اوعاك التعالي والغرور
اياك تكون مغرور
وليه تكون خسران

بلاش تكون مكسور
عيشها بكل سرور
واحذر تعيشها جبان

امشي في عينيك النور
مهما الدنيا معاك هتدور
قابل الحياة فرحان

املى بالإيمان قلبك
صلي وصوم واحمد ربك
خلقك سوَّاك إنسان

ازرع دروبك سعادة
وارويها إخلاص بزيادة
تحصدها محبة وأمان

حياتك في الدنيا ساعة
عيشها طاعة وقناعة
قناعة وليه تعيش ندمان

اهرب أكيد من الوجع
قوله خلاص اتمنع
واقلع جذور الأحزان

افتح للشمس بابك
واكسب قلوب أحبابك
اتنفس هوا الأوطان

غني وعيش غنوتك
افرح وعلي ضحكتك
واملى الحياة ألحان

خلي الأمل عنوانك
وافتح للحياة أحضانك
يطرح الأمل ألوان

الغرباوي