إنحراف
بقلمي : رمضان العلالقة
~~~~~~~
إنتي مين ؟؟؟
يا للي طالل
من شفايفك نور و نار
و ف عيونك ضي شمس
بتستحمى بالأصيل
و السما و الطير يغني
ع البحور
انزعي من جوه جوفي
كل صب
لملمي القلب اللي حب
أحضني أكبر وفاء
لما شاء الوقت
عدى ع الصخور
مر ع الشط
المضلم من سنين
ابتسم ضي النهار
انكسف من نور ملامحك
ف انهدم فيه الأنين
فتحت بساتين ورودك
و الشجر ع الفرع
طارح زهر شوق
سبلي عيونك و نادي
اسمعي لصرخة فؤادي
و اكسري وقت الشرود
دا الشروق اترسم
على صبح يضحك
افتحي عيونك و ردي
افتحي قلبي و عدي
و اقفلي أبواب زُليخة
اسكني ف قصر الخلود
عطلي كل الموانع
ينطفي شمع الزهود
أنحني لك يا أميرة
و انسجم مع كاس خمور
مش عجيبة
لو تسمي دا إنحراف
بالمودة تبقى ليكي
الروح وصيفة
و الخدم نبض الوتين
أرتوي منك يا شيخة
دا المطر ف أيام عجاف
يغسل الأحزان
و ينهي قحط صعب
مش كنت يوسف
لما يعني أستجير
أنكفي حتى الغروب
و انشغل لجل الجفاف
أرتضي بالبعد عنك
و اكتفي بنظرة حنين
دا انتي عايشة في حشايا
من صبايا .. و مش كفاية
أنصَهِر مع كاس نبيذ
صُبّي سُكري لمّا أتوه
و اترمي ف فرش العزيز
يلتئم جرحي اللي عشش
جوه مني و ابقى أتوب
~~~~~~~~~~~
بقلم / رمضان العلالقة
ليست هناك تعليقات:
إرسال تعليق