( ؛ ؛ ؛ صباحك يا وطن ؛ ؛ ؛ )
صباحك يا وطنّا حر
يشفي الصدور من غِلّ
يفرد شراع الحُب
ويرسم البسمه
داخل عيون الحُزن
ويطُل بهلاله يبدد العتمه
يهدم عشوش الظُلم
وتِمشي أيامنا
والمحن دي تمُر
يزرع كرامه فينا
تطرح جناين فُل
تخضّر من حُضنه
يغزلها من شوقه
عشان ولادُه السُمر
عشان يعيدوا الطُهر
ما هوه يامه استني
يتبدل الإنسان
ويكون كما الإنسان
لجل الأمل ميهلّ
بوصلتنا دي بتضلّ
قولولي ولأمته
نستنّى مطلع فجر ؟
ووطنّا يستني
نمد إيدنا لإيده
نقلع مداد الخوف
من العروق والروح
وقلوبنا دي تنبُض
تسطع شموس العدل
فوق حدود الشوف
قوليلي يا بلدي
لأمته نبقى ضيوف ؟
لأمته أُميه
متعرف الحُريه
دا خوفنا دا زرعه
جوه القلوب طالعه
والريّ من دمعه
جدوري من وهمك
تشيد الفرعون
من زمان وعصور
تشييدي من كدك
والجُبن بيعلّي
صروح وراها الخوف
عايش . سجين نفسك
والنفس بالفطره
تمشي فى طريق الحُر
دا العمر دا بيمُر
ترضى بدليل الذُل !
دليلنا هوه الوطن
يا وطنّا صباحك حُر
....... .... ... .. . .
أحمد الصاوي مصر ١١ / ٤ / ٢٠٢٠
ليست هناك تعليقات:
إرسال تعليق