تعالوا
(حكاية ايقاعية باللغة المحكية)
بقلم..مرقص اقلاديوس
.........
سلام سلام ..
سلام سلام..
يا سلام
لو كل الأيادي تشاور لبعضها(حاليا)
بيض و صفر...قمحيين و سمر.
يا سلام لو كل القلوب
يعشش جواها الود.
و لو كل العقول تنٓور
و تلغى العند.
اللي عامل بينها.
و بين طرق الآخرين سد.
و لو كل العيون اترفعت لفوق
تطلب من ربنا
يملا الأرض حب
و مافيش حد يكره حد.
و لو كل الألسنة
عشقت الكلمة الطيبة.
و بقت الكلمة الطيبة
للكلمة الطيبة رد.
و لو كل الاقدام
سعت فى الخير
و بقى الخير مالوش جزر
و كله مد.
سامع واحد بيقوللي
يا أخينا قلت ستة لو.
و لو واحدة
حرف شعلقة فى الجو.
طب إيه رأيكم نتلم كلنا.
و نرفع إيدينا لفوق مع بعضنا.
(كل واحد بعيد متر عن التاني حاليا)
نشد كل لو مشٓعلقة.
ننزلها عندنا.
نخبيها فى قلبنا.
طب جربوا
أنا واثق إنها هتطرح فرح.
ملاح بحور الحكمة..مرقص إقلاديوس
ليست هناك تعليقات:
إرسال تعليق