منولوج
حلة محشى
لما بقيت محبوس فى الشقه
عشان كورونا ماباخرجشى
والحبسه ديـّا مـُــٍمــلـّه وخنقه
وعليها بجد ماباقدرشى
قلت م اشغل نفسى بحاجه
خلى الوقت يعدى ويمشى
رحت السوق جبت كرمبايه
ونويت اعمل حلة محشى
جبت الرز وجبت الخلطه
جبت الملح والبهارات
خدت فلوس ومليت الشنطـه
من انواع كل الخيرات
كان نفسى اطبخ جنبه البطـه
بس مافيش فى الجيب زيادات
جبت طماطم حلوه وحمـرا
جبت كمان اربع بصلات
مالجأتش لكتاب الطهي
ولا حتى سألت الستات
جبت شبت جبت البقدونـس
م الدكان من عند ابو يونس
جبت الفلفل جبت التـوم
كله طازه بتاع اليوم
وربع لحمه بالتقسيـط
على كام عضمه من الجزار
أصل المحشى بدون اللحمـه
مايساويش ولا حتة فحمه
من غير لحمه بيبأه يتيـم
جنب الشوربه بيبأه عظيم
بيبأه لذيذ وبيضرب نار
كل مجرب مش اسرار
ٱه ياسلام لوجنبه خضار
تبأه السفره تمام وعمار
الموضوع خش على الجد ولستمرار
واللى يقول المحشى دا سهل يبأه حمار
🔪🥄🔪🥄🔪🥄🔪🥄🔪🥄
🧺🥬🧁🥠🥦🍜🍆🍅🌶🥕
سلقت بسرعه وبدأت احشى وانامسرور
ومن القاعده وطولها ضهرى بأه مكسـور
أصل الطبخ دامش شغلتنا داشغل حريـم
والستات لها بال واسع قوى وحليم
انا قرفان بصراحه ياجماعه كمان محتار
بس انا عـِنـَــــــِدى وطول عمرى باحب الإصرار
وماحبش حد يطنشنى ويقـول لأ
ببأه ساعتها عايز اطحط ف قلب الشأ
باحب اتحدى واعدى الشده ولو بـدمار
ممكن افشل ممكن اخسر بس ماخافش من الأقدار
طـبخت المحشى وكنت خايف بصراحه ل يبوز
وتفرح فـّيا ياناس أعاديـّا واضرب بـوز
لكن ربى سترها وطلعت اطعم حله
ومن الفرحه قلت ياريتنى عزمت الشلـه
تسلم ايدى تسلم ايدى
انا هديكو تلفونى وبريدى
لماجرانى شمو الريحه
عبــ عاطى ومراته مديحه
فى الحاره عملولى فضيحه
قلت سعتها يادى التلئيحه
بصيت لقيت الحاره طابور
كله شايل صحن ومبهور
قلتلهم ياجماعه بالدور
خودو بالكو دكورونا مسعور
فى الزحمه الأمر مايسلمشى
انا داخل اجيب ليكو المحشى
وهربت من الباب الخلفى
بالمحشى وانا ماشى على خـُــِفى
طلعت السطح ماحدش شافنى
ياللا تعال ياعم الحقنى
ياللا تعال اتغدى معايا
انا ملهوف دالمحشى حكايه
شمر ياللا وسمى الله
اذكر ربك ولا تنسـاه
كل بشويش بس ماتهجمشى
الصحه إن ماتشبعشـى
كل بالعافيه يـِسرى ويـِمرى
علشان تهضم تطلع تجرى
بعد ماتاكل قول ايه رأيك
بكل صراحه ولا تجاملشـى
عايز اعرف انفع طبــاخ؟
ولا انا بعكوك مانفعشـى؟
🍲🥄🥃🍲🥄🥃🍲🥄🥃
كلمات
شاعر الإحساس
رضاعبدالحميد
ليست هناك تعليقات:
إرسال تعليق