زجل بلهجة أهل الصعيد الجميله
زياره لعم أيوب
عامل إيه يا عم أيوب...
الحمدلله ياولدي...
كيف حال الخاله بهانه...
والوِلدْ حسين ومحمد...
وكيف البت الصِغيره...
بخير يا ولدي..
البت هنيه كيف حالها..
بخير ياولدي..
مش عايز حاجه...
يا عم أيوب..
لا ياولدي مستوره..
أنا إن كان علي..
إيش أعوزه من الدنيا...
أنا شايل هم...
الوِلاد الصِغار..
وخالتك بهانه..
العيانه...
خير عندها إيه...
مريضه يا ولدي..
جالها الضغط والسكر...
وعلاج التأمين..
ماعاد يكفي...
والمعاش ماعاد...
يوفي..
معلش يا عم أيوب...
والبت الكبيره جالها..
عريس إنت عارفه..
حمدان..
وِلد الحاج عِمران...
الف مبروك ياعمي..
ما خابر كيف..
أجهزها...
الدنيا بجت صعبه...
كيف أدبر جهازها...
وولد عمران مكروب...
عايز يجوز...
وكمان البت رايداه...
وراضيه بالعيشه معاه...
ما خابر كيف أجهزها...
والولد أخوها...
رايد بعد مانجح...
يكمل علامه...
الولد جاب مجموع كبير..
عايز يطلع باش مهندس...
مش خابر أن ابوه...
على جده...
كلمه ياولدي كفايه...
كده علام...
ويجعد يساعد...
أبوه الكبير...
يمكن يسمع...
كلامك إنت..
حاضر يا عم أيوب..
بس إنت أصبر يا عمي...
يا ولدي ما يكفيك...
إسمي أنا أيوب...
دا الصبر خدوه...
من إسمي...
وخرجت من عنده...
وأنا بأبكي...
على حالي..
وحال عم أيوب...
بقلمي /
سيد الحلواني
ليست هناك تعليقات:
إرسال تعليق