////////+++ بان لي التاريخ +++////////
خطوة خطوة وانا غادي
بان لي التاريخ من اجديد
قاصي لقريب جاي والغادي
هذي فضالة ازهار العيد
هالقصبة مازالت حكاية
تروي لناس سيرة لجداد
اخلقها مول الكون اية
وحفظها العالي رب لعباد
شهدة سكر قبلة الناس
ملكت اعماقي بهواها
ديك رفيقة لعمر ولغراس
بسمة ممضيعاش بهاها
سلمت اعلى السور العالي
جاوبني بحلاوة سلام
باب الترجمان لقديم البالي
جامع لبيض احديث وكلام
خبرتني الساحة بالماضي
ديك لمنسياني سحر اللحظات
محضية بعين الله الحاضي
سيدي العالم بلي ات
والعالية علات راها الفوق
شوفة منها تحيي لرواح
زينها حرك لقلوب بالشوق
خلى الناس في حبها ترتاح
مضيافة معروفة بالجود
سر من لكريم الجواد
امجاورة دالية والعنقود
ياك سيدي موسى جنب الواد
لكرم بالغلة يتفاجا
غابة والزيثون ف لحضان
سيد الشرقي قاضي حاجة
سبحان الله يداوي العيان
بسمة ف الدخلة كترحب
والشيخ ياك واقف ف داك الباب
والنسمة معاها لينا تقرب
ليك يافضالة جايين لحباب
هذبت ديك العين لشوفة
سرقت زرقة من داك لبحر
داتني لديك رمال مالوفة
خلاتني مع نجوم ولبدر
هذا الكورنيش فحديث جديد
محلاه وصيفي جذاب
ولحسنو ياك داني لبعيد
بالولفة جامع كل لحباب
شط ومرسى يسلبوكل لعقول
وملاعب القرب والباشير
كل مافيك يافضالة مقبول
يابسمة الحاضر والثغيير
////////
بقلم صقر الحروف الزجال بوسبولة المحجوب
+++
////////
بقلم صقر الحروف الزجال بوسبولة المحجوب
+++
////////
ليست هناك تعليقات:
إرسال تعليق