العم جورج والست جليلة
علقوا الزينة في يوم وليلة
والست زينة ومعاها اصيلة
طبخوا طبخة وشوية بليلة
وطلعوا في الحارة لكل عيلة
محتاجه حاجه ولو قليلة
اهلا رمضان بالخير مليان
فتح الله و جاد عملوا جمعية
عشر انفار عشان الست سنية
تجيب لولادها حاجة رمضان
والشيخ عمران طلع م الدكان
رز وسكر لكل محتاج غلبان
اهلا رمضان بالخير مليان
وعم بخيت المسحراتي ينادي
علي طلبة وعيلة عبد الهادي
اصحوا يالا السحور يا ام فادي
يالا يا جماعة الشهر مش عادي
اهلا رمضان بالخير مليان
امام الجامع الشيخ رضوان
قال نعمل خاتمة وتحفيظ القرأن
تلاوة وتفسير وجوايز وكله بالمجان
هيبقى فيه كفالة ومائدة الرحمن
اهلا رمضان بالخير مليان
دنيا جميلة بالخير والأحسان
وحارة عظيمة الكل في امان
وعم حسن شاري لبس العيد
وعامل حساب جاره سعيد
عشان عياله تلبس جديد
الست صفية بتوزع حلوي وفوانيس
علي حسن وحسني وكمان عتريس
والكحك والبسكوت علي عم ادريس
هي دي مصر وحواريها
مفيش فرق بين الشيخ والقديس
اهلا رمضان بالخير مليان
شريف محمد احمد
ليست هناك تعليقات:
إرسال تعليق