؛؛ ضحية؛؛
مين السبب؟ معرفش
ضيعت انا علي إيده
خلي الارض ليا فرش
بدل م تغطيني إيده
تلاقيني تحت الكباري
لا حد حاسس و لا داري
عمال ف دموعي اداري
و عودي اخضر م يتحملش
فارش بالاماني ع الرصيف
كل حلمي حد يديني رغيف
و بدل المقطع ألبس نضيف
صغير تايه ف دنيا م بترحمش
نفسي يكون لي اهل و بيت
انا اللي ف الشارع اتربيت
ف طاحونة المذله انا اتحطيت
مدفون ف كسرتي و م بتكلمش
ف عيوني حيره و أسئله كتيره
لما بشوف عيال وسط عيله
اسرح و اقول هو انا ليا عيله؟
ليه أمي م حنت وابويا م طبطبش
انا اللي الرصيف ليا فرشه
و السما ليا غطا و حارسه
كان نفسي اكون م التلامذه الدارسه
احلامي بسيطه و لكن مبتكملش
هايم انا في الشوارع محتقر
و كأني مش واحد م البشر
عايش دايماً مطارد و ف خطر
اتهامات كتيره منها ما بسلمش
انا الجاني المجني عليه
و سؤالي م بيتردش عليه
انا مين و ازاي و ليه؟
لو دا وطني ليه عني م بيسألش
قاتل طفولتي شتا ع الرصيف
و حرقاها الشمس بحر الصيف
يارب كتر الظلم قل النصيف
اسير الحزن و قليبي م يتحملش
يا خلق ارحموني و حِسوا
لا عايز مصمصه و لا دمعه فالصو
انا اللي الزمان نابه فيا غارسه
عاملوني كإنسان دا انا ضحية و كبش
جون جرجس فرح
19/6/2023
ليست هناك تعليقات:
إرسال تعليق