... طلعت سلبى ... للشاعر النميري نافع

السلام عليكم ورحمة الله وبركاته..

... طلعت سلبى ...

اسكت مش انا..

طلعت سلبى..

طب الحمد لله..

والف مبروك..

يا صاحبى..

الف مبروك إنى..

طلعت سلبى..

ااااااااه يا غلبى..

طبعا..

والله المفروض..

تدبح دبيحه..

وتسجد شكر لربنا..

وتدعى وتبكى..

كل ده عشان..

طلعت سلبى..

طبعا..

وأما بنعمة ربك فحدث..

وقووول واحكى..

كل ده عشان..

طلعت سلبى..

طبعا..

فضل من ربك عليك..

أنفق وذكى..

كل ده عشان..

طلعت سلبى..

مالك ؟؟

فيه ايه يا صاحبى ؟؟

كان نفسى..

اكون إيجابى..

واشتم والعن واسب..

واتف واصرخ بأعلى حسى..

كنك اجنيت..

يا فقرى..

زعلان إنك...

طلعت سلبى..

كاره حياتك..

عايز تموت بدرى..

دا فيروس بيقتل..

مش هزار..

معاك عيال..

احمد ربك إنك..

طلعت سلبى..

ياخى بطل رغى..

وكلام فاضى..

كان نفسى..

اكون إيجابى..

فى حب صاحبى..

صاحبى مات من الإهمال..

وانا قاعد..

بكتب رثاء..

وانكت واهرى..

كان نفسى..

اكون ف جاره..

وودعه..

واخده ف حضنى..

كان نفسى..

اشيله على كتفى..

واقوله..

سلام يا صاحبى..

اهداء الى فقيد دفعة صيدلة الأزهر ٢٠٠٠..

د. أحمد عبد الستار.. إثر إصابته بفيروس كورونا..

بعض المفردات العاميه..

كنك... كأنك

اجنيت.. أصابك الجنون

حسى.. صوتى

اكون في جاره... بجانبه

تحياتي..

والسلام عليكم ورحمة الله وبركاته.

... النميرى نافع